لقاء مع معالج الصقور الأشهر على مستوى الخليج الصقار خالد العويدي

 

السلام عليكم،،

اجرة احد المنتديات مقابله 

مع الصقار الكبير ابن العم خالد العويدي،،

في هذا الموضوع سأطرح عليكم مقابله مع الصقار المعروف 

ودكتور الصقور الاول وهو غني عن التعريف عند اكثر صقارين المملكه ان لم يكن عند صقارين الخليج ولا اعتقد انه يوجد صقار في المملكه لايعرفه او قد سمع عنه وهو خالد بن عبد الله بن محمد بن ناصر  العويدي

 

اولا بطاقته الاسم / خالد عبد الله محمد العويدي

العمر / 42 سنه

 بلد المنشأ / مدينة الزبير بالعراق 

المهنه / معالج للصقور ومن كبار صقارين المملكه

 الان مع المقابله 

ابو عبد الله السلام عليكم وعليكم السلام ورحمة الله وبركاته اولا يابو عبد الله اصالة عن نفسي ونيابة عن جميع المنتسبين لمنتدا طير ارحب فيك وقول لك شرفتنا بقبولك طرح المقابله وهذا شرف لنا 

ياهلا ومرحبا فيكم وانا بعد اتشرف بكم وبهذا المنتدا الراقي 

ياابو عبد الله نبدا بالاسأله متى بدأت علا قتك بالصقور

تقريبا عام 1975 م طيب متى بدأت بعلاج الصقور

 تقريبا كا عام 1982 م 

هل تذكر اول طير اقتنيته 

نعم كانت شيهانه جبليه فرخ

حدثنا عن انواع الصقور والوانها 

من انواع الصقور الحر ومنها التام ومنها المثلوث والشيهان ومنها البحري وفيها التامه وفيها المثلوثه ومنها الجبلي والوكري وكل نوع من الطيور لها مواكر (اي اماكن تكاثرها) منها الفارسي ومنها الروسي ومنها الشامي والليبي والتركي وغيرها من المواكر وايضا لها الوان مختلفه فيه الاشقر والاشعل والابيض والاسود والادهم والخضر والاحمر ولا يميز مواكرها والوانها الا صقار متمرس

ابو عبد الله حدثنا عن اول حبارى صدتها متى كان الله يسلمك 

كانت عام 1976م في يوم الاثنين في عطلة الربيع كنت قانص مع الوالد الله يرحمه واصدقائه

نبغا يابو عبد الله طير مر عليك ولا نسيته من طيبه 

هذا طير جاني من العراق احمر صافي عليه طلع وسبق يهول ماشفت مثله ابد وكان ماكره فارسي 

يابو عبد الله وشي اكثر امراض الطيور

 الجدره والدوره(الصرعه) والسده والنهته والقلاع والديدان وغيرها 

ماهي اغرب حاله مرضيه مرت عليك يابو عبد الله 

قلاع في العين واجريت له عمليه واستأصلته

كم حاله تمر عليك يوميا 

والله تختلف في القيظ وقت الربطه تقل الحالات شوي وفي الشتاء تزيد يعني تقريبا من 20 الى 30 حاله

ماهي اكثر الامراض اللي تمر عليك

 القلاع ودق المدهنه والتوسير(تجبير الريش المكسور)

ابو عبد الله هل تستخدم التخدير (البنج) 

لا استخدمه ولا اؤيده 

هل ترى اختلاف في هوايت الصيد في الماضي عن الحاضر

 اكيد فيه اختلاف اول كانو قليلين الصقارين وهالحين ماشاء الله كثيرين وكثر ايضا محلات بيع الصقور واصبحت تباع بالاستراحات وصارت هالحين ميسره الصقاره اول الواحد يضيع طيره بسهوله وهالحين بعد الاجهزه قل الضياع ولله الحمد

 

طيب حدثنا عن الفرق بين صقارين اول وهالحين

 اول الصقارين صحيح..... وهالحين بعض الصقارين دخل مجال الصقاره وللاسف يسيء للصقاره ولا يقدّر الطير ولا يعطيه حقه من العنايه والتدريب 

يابو عبد الله كنت من الملازمين للصقار المعروف شارع عبد الله الحبابي رحمه الله فهل تحدثنا عنه 

الله المستعان الله يرحمه كان ذو نظره ثاقبه في معرفة الصقور وكان يعطي كل طير حقه في السعر ولا يبخس الناس بالسعر وهو اول من شجعني بالتوسير 

بعد ان وسرت له شيهانه فتعجب من اتقان التوسير

اخ خالد اشكرك على المقابله الشيقه والمفيده 

لاشكر على واجب والله يحييك .

من كلمات الصقار بدر ""الملقب "ابوالجازي"

مناسبة القصيده انه كان طيري الاول (نواف) مريض وحاولت بشتى الطرق ان اعالجه وعند بعض المعالجين للصقور ولكن دون جدوى وذهبت به لخالد العويدي وماشاء الله عليه لمسات خفيفه مه بعض الادويه وشفي الطير بحمد الله وقلت القصيده اللي اقول فيها

ويقول فيها:

يازين نثر الريـش فالـروض زينـاه ***** لاصـرت تـوّك ذابح(ن)لـك حبـارا

روض(ن) خضر ماطبه احد(ن) ولاجاه******ماغير انـا والشيـخ شيـخ الزبـارا

ولد العويـدي خالـد الطيـب مبـداه******مـودع صقاقيـر الجزيـره حـيـارا

لشكل عليهـم شـي بالطيـر تنصـاه******ويلقـون حـل المشكلـه بأختصـارا

من عقب ماحاول بـه الطـب بـدواه******مافادهـم طبـه خبـيـر النـصـارا

بس العويدي عـارف دواه مـن داه******من نظرة(ن)وحـده يصيـب العيـارا

انا اشهد انه من هل العـرف والجـاه******وفي خبرتـه بالطيـر مالـه مجـارا

وراعي معاميل(ن)على النـار مركـاه******ويازيـن صفتهـا بهـاك الـوجـارا

هذي تصَبْ وذي على النـار تصـلاه******دايــم وبيـتـه مدهل(ن)للخـيـارا

اشكـال والوان(ن)مـن البـن تلقـاه******وفيهن من الهيل الخضـر والبهـارا

طيب وشهامـه والكـرم فعـل يمنـاه******لاماعلـى طيـب العويـدي غـبـارا

مـن ماكر(ن)لاهـد مخلابـه ادمـاه******ماكـر حـرار وكـل جنيـه نــدارا

وابوه قبلـه ماشـي(ن)درب ممشـاه******واليـوم خالـد لصعيـبـات ســارا

وصلّو على اللي ثبّت الدين وارسـاه******محمـد رسـول الله ليـل ونـهـارا